Matthew 12

Yesus Unna, Kangas Indhanana Kuwulva Wulluhunv, Kava Unvrava, Mana Vemava Himba Vivra Sapturamba.

Mak 2:23-28, Luk 6:1-5

1Sismba Yesusva hevna aonghal mahalnindm wongavna sapturamba vah iaevul okombanam. Himba monam wongavna, ten osohovmonam dihelgavm. Yesustindimba doa pon vinvna, wo doa hev witmov pueitnamba, noi hlawulangavna. Monglava doara di Varisinindva lovahvna, nungeilnamba hemba, wo umnina Yesusm, nongaltok, yetindiva doa doaramini lohohmomba pilpikovoi, os novol velohv, manam osva vivav vah iaevul okombanamba.

3Yesus unna no Varisinindm, katindiva lehra viv, mongova men moamba os novol velohv pina Devitna simbelnamba, himba nomba osva vivna, wo yimba beswonamba hillivnamoa dihi?

4Yimba nonora, Devittindimba eva ponmba vinnata, wo himba Sesoana sembayangduvra wonsihanamba, wo roti vra, honi men piv sevrivm, no rotiva Sesoana novrava nalohv. No rotiva heva sembayang andranindangas hlav, ombandhanamba owai, es eva hlavav. Heva os Devitva vrana no rotiva, hev eva hevtindi os wonnena, hemba nonamba mindnam pon vinvna.

5Mongmomba eva novol velohvta Mosesnamba honi vah iaevul okombanamba, wo kava os nengv, yimba beswonamba hillivnamoa. Sembayang andranindva tempelduvmerava himba andra viv hevna andrava diva vah iaevul okombanamba, ombakombonamangasva owai. Himba hevna andramba wuleihivavmoa vah iaevul okombanamba, wo heva os moamba os novol velohv, lehra viv, himba sahonamba vivmoa.

6Hillu, pina doaramini lohohmomba eva pina tempelduvpa hevm mendekli, wo heva os mongo men nemel tendorini, wo hev eva hevtindi himba mendeklinonoa. Hetatanamba mendeklinonoa, heva os tempelduvpa mani mendeklima, wo yeoa hena moamoa wohhellangas vinvm.

7Mongmomba os novol velohv, Sesoava os ona, innepeta tata suwera wesang wevsa besal mendekli, heva os indhanana wevsava, temba owalmba akolvramona vevpa, temba mendeklinonoa, kava nom und vev. Moamba nomba os novol velohv, heva os yimba beswonamba hillivnamoa. Yimba doarava hillitava plalmomba no moanamba, wo osva yimba ata katindiva nangwol ovuvavmoa huiva.

8Kava arana ombol, wo Sesoa kamba hev hona mendeklimomba vraohna, wo kava noinda indhanamba wohtvra, mana vemamba himba velmba vivrava hona vahi aevul okombanamba.

Yesusva Mongo Indhanarinim Engla Vendpethalmungilm Sishona Vrena No Vah Iaevul Okombanamba.

Mak 3:1-6, Luk 6:6-11

9Yesusva nominiva venamba, wo sembayangduvra siha, mongova indhanariniva doara di avna, henamba englava doara heva doa vendpethamnana, no mungil avna. Varisinindva doara di lovahna, wo hev umnina Yesusm, es yimba nengv, es hevpa yimba lehra sishona vrevavma indhanarinimba hona vah iaevul okombanamba?

Himba ambo dasalm umnivna Yesusmba, doara doa himba hevmba ishuvna, osva Yesusva hona indhanarinimba sishona vretava detiva, ata pimba Yesusmba wetat uvav kuwulinda osva, Yesusva doa pilpikoheini lohohmomba pinamba.

11Yesusva doara nonora, himba temba osva ningvnamba, wo Yesusva hemba olhmona unna, yenamba sipsippa mellava mongova selvopetava honanamba detiva, es hevpa yimba holvopivongovavma a owaimi? Yimba holvopivongovavta, noinda hevm besalta, eva kamba indhanamba sishona vewolalmba detiva. Yimba osva tit vivma, indhanariniva mendeklinonoa, sipsippa owai? Kava hona indhanarinimba ata sishona vrevrava, osva kava pilpikohavavmoa pivna doaraminimomba, owai.

13Wo Yesus omnana no indhanarinim englapetmungilm, engla pevna liotok, no indhanarini shuana hevna englam, wo hena englava os henga wohkanandhana.

14No Varisinindva os wohphopiana ambaramba, wo hevm eishu vreihungu vevna, es hevpa pivva Yesusmba helvakomandhivavma?

Yesusva Uvavulmungilmba Mindnam Sishona Vewol Vevna.

15Yesusva nonora luhunvna, himba ningminiv, kam helvakomandhalm, wo hevpa os wohgana nominiva mongnahalm. Indkumbiva sis pelpethaomana venavna, wo Yesusva uvavulkoklamungilmangas sishona vewol vevna.

16Yesusva ongawolvna keknam, manam muserava yimba ishunvra indhanamba, osva Yesus kamba sishona vrei. Yesusva wohengvna moamba Aisaia moashulnindrinina doaramininamba, nomba moamba os novol velohv,

18Sesoa unna, men kana andranindriniva, kava kav kikih vrena hemba, wo kava hemba mindnam und vev, indk vethamnav, kava si kavsongolva heindamba wolaihapravav, wo os himba nonapopol si ishunvra Yutanindna meisnindmba, osva Sesoava si yemba lesvhoawol vevav beswonam. 19Noi kana andranindriniva si indhanamba ongawolvavmoa, eva vevandnamba ishunvavmoa hemba, himba muserava hulaikalawonamba indhanamba ishunvavmoa. 20Himba si ambo innenal indhanarini lohvra, himba si indhanamba kinwondava pelhola vinvavmoa, owai, himba si kolvrowol vevra hemba, wo indhanamba noinda si osva uvav, Sesoana wevsava lehra, himba pimba lesvhoawol vev. 21Yutanindna meisungundva indkumbi si he hona indhanarinimba osva umnivav, hengas keknamba lohv, wo he si pimba kolvrowol vevav. ^a

Yesus Unna Varisinindm, Yenamba Indkoklava Wohluhunv, Yimba Kana Moamba Wohkek Vithivnamoa.

Mak 3:20-30, Luk 11:14-23 eva 12:10

22Henga mongo indhanarinim waiambna Yesusindam, heva doara nemet tihsongo hena nihmera sihanamba, wo himba noinda vena, novtit vevna, moahui lohvna, moalamangva pongthoamnana. Wo doa Yesusva hemba sishona vrenamba, doa henga himba beswonam nongalvnamba, moa ishovna. Wo indkumbiva no indhanarinimba nunglivnamba, nihtov daihaprinvna, pem viwul vevna. Himba os hevmba eishovna, Yesusva dihi Kristus lohvma, nomba Devittindirini lohv?

24Varisinindva no moamba hillivnamba, indhanamba temba hemba ishunvnamba, osva Yesusva Kristus lohvma? Wo heva os himba hevm eishovna, owai Yesusva andranindrininonoa, himba Setannapopol vev, Sesoanapopolva owai. Setanmba kuwul wulluhunv tihsongonamba, wo noinda osva Yesusva wolapho vev tihsongomba indhanana nihmerinimba Setannapopol. Himba ambo dasalm uvna.

25Yesusva doara nonora luhunvna Varisinindna nengavnangmba, wo himba olhmona unna hemba, yimba dasalm uv. Hev unna, mongnindva avra, wo daos oho hevm, wo hev os muhavav, avavmoa. Wo es hevpa Setanmba hevnamba owalmba wulengvapiangatava hevna indhanaminiva, temba os hevm ahalvakomandhavav owalmongo, wo os wohsihavav.

27Yimba os uv, Yesusva Setannapopol tihsongomba wolapho vev. Yetindiva henoi ten wolapho vevm tihsongom indhananamini, wo annapopol himba viv? Yeoa hemoa sahowol viu, yemba si himba ishunvav, Sesoanapopol.

28Sesoasongolva kolvrav kamba, henapopol kava wolapho vev tihsongokoklava. Memba honamba os, Sesoava doa hevtindim wonav beswonam, heva os owai, yimba liheivnamoa.

29Yesusva mendah Varisinindmba olhmona unvna, os mongova indhanariniva lohvra, kelsombovhol indhanarini avra, an sihavav no indhanarinina deuvrava, osmba wohva hevm wohingavav? Henongas henoi seilm saongna no kelsombovhol indhanarinim ningevavm, wo himba no wohva os wohingavav.

30Indhanamba himba nomba temba kamba andrava velmba owai vinivpa, himba tanam kana moamba hillivmoa. Indhanamba himba nomba kamba kolvralmba owai vivpa, osonnamba kokolma velmba kana deuvrava, himba tanamolnam no innemba dembhanga viv.

31Indhanamba himba nomba Sesoamba indkokla vrivpa, moakoklanamba umnivpa, Sesoava si maivethinvav hena indkoklamba. Wo heva os indhanamba himba nomba Sesoasongolmba moakoklanamba umnivrava, temba mendeklinonoa indkoklava, Sesoava nomba henamba si maivethinvavmoa, si yunalm wohluhunvav no indhananamba.

32Indhanamba nomba kamba arana ombolmba moakoklanamba eishomnavrava, Sesoava si no indkoklava maivethinvav, wo heva os indhanamba moakoklanamba umnivrava Sesoasongolmba, temba mendeklinonoa indkoklava, wo si yunalm luhunvav no indhananamba, nonamba Sesoava si lesvhoawol vevrava indhanamba.

Yesusva Olhmona Olhinna, Timovm Tillinim Besalm Sahoklalm.

Luk 6:43-45

33Yesusva mendah ishunvna Varisinindm, movolla pimba osva liheivav, hona denwitva besal lohv, hona denwitva sahoklal lohv. Denwit besalva movolva besal kethav, sahoklalva tilva movolva sahoklal kethav.

34Yimba sahoklal indhana, os maim oi, saipusuhla. Yimba sahoklal indna vilov, wo noinda es eva moa besalva yimba ishuvav, owai. Manara noinda mindemba yenamba kolmal dombv undna. 35Besal indhanamba besal indna vilov, wo himba moamba ishuvpa, himba tanamolnam wohishuv mana vemamba. Sahoklal indhanamba indkoklanamba, wo himba moamba os ishuvpa, himba mana vemamba sahoklalm ishuv, wo himba dasalm uv.

36Si sewonamba pethava mueisowa vevrava, Sesoava si lesvhoawol vevav yemba, wo eva no moam si sahowol vevra, nemet ten pev ishuvnam indakondakonda moa, eva moa eusilva yimba temba ishuvnamba, nomba temba yimba beswonamba ningvnamoa. 37Nonamba Sesoava yemba beswonamba nongalvrava, temba osra, yimba hona petharava moamba beswonam ishovna. Heva os nonamba Sesoava moamba wulluhmanatava yemba, temba noinda yimba doa nemetva moakoklava ishovna hona petharava.

Yesus Unna Varisinindm, Owai, Kava Si Andramendekliva Yena Novrava Vinvavmoa.

Mak 8:11-12, Luk 11:29-32

38Henga katekis eva Varisinind hev umnina Yesusm, kana novra andramendekli vintok, osm kav nom nunglivav, wo uvav, tanam memba honamba Sesoanaminiangas.

39Yesus unna, owai, yimba indhanakokla, wo yimba kamba engivmoa pevna undnahonamba. Yimba ambo dasalm kamba sah ovrivna, kava nonglalm viv andramendeklim. Sism si yimba nunglivav mana vemamba mendekliva, kamba venavrava, os ten nemet moashulnindrinim Yonam venanam. Honamangas yimba si nunglivav.

40Yimba nonora, nemetva Yonava tambkona emerava samblamongonin vena, wo himba henga os phona. Wo kava si sismba samblamongonin vevav pethamerava, wo si henga kava beswonam phovav.

41Kava si os vevav, wo sismba Sesoava indkumbimba indhanamba lesvhoawol vevrava, himba si yemba os unvav, es hevpa yimba eva? Wo nonamba Nineva kotanindna englapundva si owosaluhunvav yeinda, os yenamba sahokla luhunv. No Ninevanindva himba Yonana moamba hillivna, wo hevna sahoklalmba wuleihina. Wo yimba hona indhanamba owai, wuleihivnamoa pevna sahoklalmba. Kana moamba mendekli kuvhoav Yonanamba, wo heva os yimba hillivmoa, wo pevna sahoklalmba wuleihivmoa.

42Sismba Sesoava nonamba yemba lesvhoawol vevrava, kuwul mendekli puehalnindrini himba hevna englapundva si yeinda woseinvav, yenamba sahoklava luhunv. No kuwul mendekliva ehalmini prona pethamullini, kuwul Solomonm nonglalm, himba hellelm vevna Solomonna Sesoamom. Wo kana moamba kuvhoav kuwul Solomonna moamba, wo heva os owai, yimba hillivnamoa.

Yesusva Hemba Olhmona Unna, Weihaloh Vewol Viu Pevm, wo Kam Pevna Undnahonam Ningminivm.

Luk 11:24-26

43Yesusva mendah ishunvna katekism eva Varisinindm, yeoa pevm weihaloh vewol virava, kana moam engivm, si homeis yena und ambo nis lovahinvm. Men os, indhanariniva mongova tihsongomungilva lohtava, hena nihva snal maim ui, tihsongona deuv, no tihsongova pholahangatava, di ambo lohmana vevra vuhekoklara pohuira, vuhe besalm silelvra, noindam eha vawolm.

44Heva os owai, no tihsongova os ov, kava henga gav, dom ten seilm kav avnam kavna deuvmera. No tihsongova hengava gavnamba hevna deuvramba, ovna novvesiha vevnam, mongova indhanariniva avmoa, deuvpa ambo povawov beswonam, kava henga si hui wohavav.

45Heva os seilmba himba ganamba, owalm 7pelara onkeinna tihsongo owalm, temba nomba indkoklalnonoa, wo no deuvram wonprona, wo di mongawulm aevulvna. Wo no indhanariniva si os wohindkokla vovhoavav, hena nihmerava tihsongova mindnam aevulv, mongalva owai. Yimba indhanakokla, wo noinda osva yeoa pevmoa weihaloh vewol vivm.

Yesus Unna, Anmund Kana Towandaslalva?

Mak 3:31-35, Luk 8:19-21

46Yesusva mendah ishunvna, wo indkumbiva os helletithoavna, wo Yesusna avaltatanamba ambanamba, amballa lovahtha, wo una, kava Yesusm moam isholm viniv. 47Mongo indhanarini di omnana Yesusm, yena avapevtatanamba ten amballa lovahv, himba yem moam isholm viniv.

48Yesusva no indhanarinim nongla, wo ona, an kana avalva, wo eva anmund kana towandaslalva? Himba mendah wohishunvna, wo hevna aonghal mahalnindmba indthoawol ovovna englana, men hona indhana, kana avalnamba, towandaslalnamba. Indkumbiva himba nomba kana senaminina arana moamba kek vithirava, eva engivrava, temba himba nomba katindi.